ધન્ય જનેતા December 31, 2006

ધન્ય જનેતા જેની કૂખે જન્મ્યાં સદ્ ગુણી બાળ
ધન્ય જનેતા તેની જેણે સમર્યા શ્રી ગોપાળ – ધન્ય જનેતા.

ધન્ય જનેતા તેની જેણે દીપાવીયું નીજ નામ.
ધન્ય જનેતા તેની કીધાં પૂણ્ય તણાં બહુ કામ. – ધન્ય જનેતા

ધન્ય જનેતા તેની આપે આત્મ તણાં બલિદાન.
ધન્ય જનેતા તેની ન મળે કાયાનું અભિમાન – ધન્ય જનેતા

ધન્ય જનેતા તેની જેણે તાર્યાં માત ને તાત .
ધન્ય જનેતા તેની જેથી દીપે નાત ને જાત .- ધન્ય જનેતા

ધન્ય જનેતા તેની જેના દિલમાં ન મળે ખેદ
ધન્ય જનેતા તેની જેના અંતર મહીં નહિ ભેદ. – ધન્ય જનેતા

ધન્ય જનેતા તેની જેણે રીઝવ્યા શ્રી જગદીશ
ધન્ય જનેતા તેની જેના અંતર ન મળે રીસ. – ધન્ય જનેતા

ધન્ય જનેતા તુજને મુળજી ચરણે નામે શીશ
પ્રેમ ધરી બાળકને આપો પ્રભુ મિલન આશિષ. – ધન્ય જનેતા

એવી માતા ઘર ઘર થાજો દીપાવજો સંસાર
એનાં બાળક અમર થતાં રહે આનંદનો નહિ પાર. – ધન્ય જનેતા

- મૂળશંકર ત્રિવેદી