ઓ લહેરી જીવડા January 28, 2007
કહું છું હું સુણજે ધરી કાન રે, ઓ લહેરી જીવડા.
પ્રેમે તું લેજે હરિનું નામ રે, ઓ લહેરી જીવડા.
જગ્તનો પવન જ્યાં તુજને અડ્યો, ઓ લહેરી જીવડા.
પ્રભુ ભૂલી માયાની લહેરે ચડ્યો, ઓ લહેરી જીવડા.
વિભુ ભક્તિ માટે આવ્યો ખાસ રે, ઓ લહેરી જીવડા.
બનીયો તું માયા કેરો દાસ રે, ઓ લહેરી જીવડા.
માયા લાગે છે તુજને બહુ મીઠી, ઓ લહેરી જીવડા.
જાણે કે કદી તેં તેને નવ દીઠી, ઓ લહેરી જીવડા.
વહાલા તો લાગે તુજને દામ રે, ઓ લહેરી જીવડા.
આખર નહિં આવે તારે કામ રે. ઓ લહેરી જીવડા.
નાણાંથી કરી લે તું શુભ કામ રે, ઓ લહેરી જીવડા.
ડગલે ને પગલે લે હરિ નામ રે, ઓ લહેરી જીવડા.
મુળજી તું લેજે પ્રભુનું નામ રે, ઓ લહેરી જીવડા.
સરશે તેથી તો તારું કામ રે, ઓ લહેરી જીવડા.
- મૂળશંકર ત્રિવેદી
