બાળ તારો ખોળે પડ્યો રે દયાના સાગર
મારો કે ઉગારો હવે રે, દયાના સાગર – બાળ તારો …
માયા દેખી લપટાયો, મોહે તો મુજને ફસાવ્યો,
સાચો માર્ગ ભૂલવાડ્યો, દયાના સાગર – બાળ તારો …
અણદીઠું જાણે રે દીઠું, ન કરવાનું કાર્ય કીધું,
દુઃખ હાથે વહોરી લીધું, દયાના સાગર – બાળ તારો …
છોરું તો કછોરું થાયે, માતતાત દિલમાં ન લાવે,
આખરે તેને બચાવે , દયાના સાગર – બાળ તારો …
હાથ ઝાલી સાથ આપો, ચરણ કમળે સ્થાપો,
મુળજીને દીક્ષા આપો , દયાના સાગર – બાળ તારો …
- મૂળશંકર ત્રિવેદી
