ગાઓ ગાઓ ગોવીન્દગુણ ગાઓ,
આ અવસર નહીં આવે
લેજો લેજો તમે આજ લા’વો,
આ અવસર નહીં આવે.
કાયા કાચો કુમ્ભ છે, ફુટતાં ન લાગે વાર,
મોંઘો મનુષ્ય આ દેહ મળ્યો, માટે સફળ કરો અવતાર. … આ અવસર..
મારું તારું તું કરે, તેમાં સરે ન તારું કાજ,
સેવા કર તું શામળીયાની, જેથી રહે તુજ લાજ. . … આ અવસર..
કામ-ક્રોધમાં લપટાવાથી વણસે તારું કામ,
મોહ લોભથી છુટવા, તું તો લેજે હરીનું નામ. . … આ અવસર..
શીયાળ કેરી સો યુક્તીમાં, કામ ન લાગી એક,
એક યુક્તીથી આપે તરાશે, જેમ માંજારી કેરી ટેક. . … આ અવસર..
તુલસીએ તો પ્રેમમાં, ઝાલ્યો રામનો હાથ,
દ્રઢ નીશ્ચયને કારણે, કૃષ્ણ બન્યા રઘુનાથ. . … આ અવસર..
કાચબો – કાચબી ચઢ્યાં અગ્ની પર, પ્રભુમાં દ્રઢ વીશ્વાસ
અઢળક મેઘવૃષ્ટી કરી, તેની પ્રભુએ પુરી આશ. . … આ અવસર..
મુળજી મન નીશ્ચય કરી, લેજે પ્રભુનું નામ,
લાજ સોંપજે શામળીયાને, પછી તારે બીજું શું કામ? . … આ અવસર..
